Ризабек Айтмұхан еркін күрестен Олимпиада чемпионымен белдеседі

Еркін күрес стилінде белдесетін қазақстандық Ризабек Айтмұхан америкалық Кайл Снайдермен белдесу өткізуі мүмкін.

Бұл белдесу ақпан айында Алматыда өтеді деп жоспарланған PWL 8 турнирінде болмақ. 

Күрестен Professional Wrestling League америкалық балуанның турнирге қатысатынын растады. Сонымен қоса, ұйым Ризабек пен Снайдер арасында белдесу өткізу бойынша келіссөз өтіп жатқанын да хабарлады.

Ризабек атын тарихқа жазған балуан

Еске салайық, Ризабек Айтмұхан бір жылда үш әлем чемпионатында жеңіске жетті. 2023 жылы ол ересектер арасында әлем чемпионатында (Белград, Сербия) жеңіспаз атанған алғашқы қазақстандық ретінде тарихқа кірді.

2024 жылы күзде қазақстандық балуан Испанияда өткен 20 жасқа дейінгілер арасындағы ӘЧ-де алтын жеңіп алды, одан кейін Тиранада өткен жастар арасындағы әлем біріншілігінде де топ жарды. 

Америкалық балуан боз кілемде талай топ жарған

Ал америкалық балуан Кайл Снайдер 97 келіде 2016 жылғы Олимпиаданың чемпионы және 2020 жылы Токиода күміс жүлдегер атанған. Сонымен қатар, ол әлем чемпионатында үш рет жеңімпаз болып, екі рет күміс және екі рет қола жүлдегер атанған.