"Барыстың" экс-ойыншысы Олимпиадада гол соқты

Канадалық Корбэн Найт Олимпиадада АҚШ қақпасына шайба соқты, деп хабарлайды Vesti.kz тілшісі. Алайда шабуылшының голы командасының жеңіске жетуіне көмектесе алмады.

"Барыстың" экс-ойыншысы екінші кезеңде ерекшеленді. Оның салған шайбасы таблодағы есеп айырмасын қысқарта (2:3) алды. 

Кездесудің нүктесін ҚХЛ-да өнер көрсететін "Торпедо" хоккейшісі Кен Агостино (2:4) тіркеді. Осылайша, америкалықтар Бейжіңдегі ойындарда екінші жеңісіне қол жеткізіп, А тобының көшін бастады.

Үйеңкі жапырақ елінің өкілдері болса алғашқы матчында Германиядан келген қарсыластарын 5:1 есебімен ұтып, Найт командаластарына гол соғатын мүмкіндік жасаған еді. Өз кезегінде АҚШ құрамасы жарыс қожайындарын 8:0 есебімен ойсырата ұтты.