Уорд Ковалевпен қарымта кездесу үшін қанша алатыны белгілі болды

Ресейлік кәсіпқой боксшы Сергей Ковалевтің (30-1-1, 26 КО) қазіргі чемпион Андре Уордқа (31-0, 15 КО) деген жеккөрініші төленетін гонорар айырмашылығына байланысты болуы мүмкін, - деп хабарлайды vringe.com.

Қарымта кездесу үшін Андре Уорд кемінде алты миллион доллар алады, ал Ковалевтің ақысы билет сатылымы мен ақылы көрсетілім (PPV) жиған қаржыға байланысты болады. 

Ковалевтің менджері Эгис Климастың пікірінше, Уорд ресейлік боксшының гонорары адамның күлкісін келтіретіндей болу үшін медиа жарнамаға әдейі мән бермеген. 

Ал Roc Nation Sports компаниясының стратегиялық даму бойынша президенті Майкл Йормарк бұл пікір шындыққа үйлеспейтінін айтады. Өйткені соңғы баспасөз мәслихатын Ковалевтің өзі көзге ілмей, ерте шығып кеткен. 

"Сергей алғашқы жарнамаға көп күш жұмсады. Ол американы толық айналып шықты. Уорд шоуды жарнамалауды ойлаған да жоқ. Оған бұл керек те жоқ. Оның әкетайы бар (Jay Z), ол қандай жағдайда да Уордқа жеті миллион төлейді. Сергей болса әрбір тиын үшін тер төгуі керек", - дейді Климас. 

"Сергей қаржыны оңай тапқан жоқ. Ал Уорд өз компаниясының табысынан да артық алады. Мен Сергейдің неге мәслихаттан ерте шығып кеткенін түсінемін. Ол маған былай деді: "Білесің бе, ығырым шықты. Енді ол камераға кішкене жұмыс істесін", - дейді Ковалевтің промоутері Кэти Дува.

Еске салайық, Ковалев-Уорд жекпе-жегі 17 маусымда Лас-Вегаста өтеді. Олардың алғашқы кездесуі былтыр қарашада өтіп, төрешілер шешімімен Уорд жеңіске жеткен. 

Қазақстанда бұл жекпе-жекті "Хабар" арнасы тікелей эфирден көрсетеді. Көрсетілімнің басталауы Астана уақыты бойынша сағат 08:00-де (18 маусым).