Қазақстандық боксшы Емельяненконың андеркардында өнер көрсетеді

Ауыр салмақта өнер көрсететін қазақстандық боксшы Али Балоев келесі кездесуін 24 қыркүйек күні Мәскеу қаласында өткізеді, деп жазады Vesti.kz тілшісі. 

Жекпе-жек Мәскеу қаласындағы ЦСКА спорт кешенінде болады. Бұл кешті Hardcore Boxing компаниясы ұйымдастырады. Шоудың басты кездесуінде ресейлік файтер Александр Емельяненко мен Вячеслав Дацик жекпе-жек өткізеді. Балоевтің Instagram желісінде таратқан ақпараты бойынша, оның қарсыласы ресейлік Курейш Сагов болады. 

Саговтың кәсіпқой бокстағы рекорды - 6-2, 2 КО. Ол соңғы жекпе-жегін отандасы Евгений Тищенкоға қарсы өткізіп, жеңілді. 

Еске салайық, осыған дейін Балоев әуесқойлар арасында әлем чемпионатының жүлдегері өзбек Санжар Тұрсыновпен (3-0, 1 КО) қолғап түйістіруі тиіс еді. Бұл айқас жоспар бойынша 28 қыркүйек күні Чехия жерінде өтуі керек болған. Алайда екі тарап келіссөздер нәтижесі бойынша ортақ шешімге келе алмады.