"Чемпиондар, қайдасыңдар?". Әлімханұлы бұрынғы әлем чемпионын жеңгеннен кейін мәлімдеме жасады

Кәсіпқой бокста жеңілістің кермек дәмін татпаған қазақстандық боксшы Жәнібек Әлімханұлы өз салмағындағы әлем чемпиондарын айқасуға шақырды, деп жазады Vesti.kz порталы. 

WBA белбеуінің бұрынғы иегері америкалық Роб Брантты (26-3, 18 КО) жеңгеннен кейін отандасымыз әлем чемпиондарын нокаутқа түсіргісі келетінін айтты. 

Еске салайық, Әлімханұлы Лас-Вегаста өткен боксшы кешінде техникалық нокаутпен жеңіске жетті. Себебі, америкалық боксшының командасы айқасты ары қарай жалғастырудан бас тартты. 

"Чемпиондар, қайдасыңдар? Мен сендерді нокаутқа түсіргім келеді", - деп жазды Әлімханұлы твиттер парақшасында. 

Where are you champions? I want to knock you out. pic.twitter.com/l6DAv82duv

— Janibek Alimkhanuly (@qazaqstyle) June 27, 2021

Айта кетейік, Жәнібек жұдырықтасатын орта салмақта төрт әлем чемпионы бар. Тарқатып айтсақ, IBF және IBO белбеулерінің иегері - Геннадий Головкин, WBC белбеуінің иегері - Джермалл Чарло, WBA Super белбеуінің иегері - Риота Мурата, және WBO белбеуінің иегері Деметриус Андраде.