Роналду атақты Раульдің рекордын жаңартты

Мадридтік "Реалдың" шабуылшысы Криштиану Роналду Испания біріншілігінің 11-турында "Лас-Пальмасқа" қарсы өткен ойында нәтижелі паспен көзге түсті. Осылайша, португалиялық шабуылшы "корольдік" клуб сапындағы 84-ші нәтижелі пасын берді. Бұл туралы "Чемпионат.com" порталы хабарлайды. 

"Лас-Пальмасқа" қарсы өткен ойындағы нәтижелі пасынан кейін Роналду "Реалдың" даңқты шабуылшысы Раульдің рекордының мұртын бұзды. Испаниялық шабуылшы 83 пас берген. Бұл көрсеткіш "Реал" тарихындағы соңғы 25 жылдағы ең үздік нәтиже. 

Айта кетейік, Роналду биылғы маусымда "Реал" сапында Испания біріншілігінде жеті ойынға қатысып, бір гол және екі нәтижелі пас берді. 

CRISTIANO - 84
Raúl - 83

¡@Cristiano supera a @RaulGonzalez como máximo asistente del @realmadrid en #LaLiga en los últimos 25 años! pic.twitter.com/GRv5nWnts8

— LaLiga (@LaLiga) 5 ноября 2017 г.

Еске салайық, кеше "Реал" футболшылары өз алаңында "Лас-Пальмасты" қабылдап, 3:0 есебімен жеңіске жетті. Кездесуде мадридтік клуб сапынан Каземиро (41-минут), Марко Асенсио (53-минут) және Иско (74-минут) гол соқты. Осылайша, "Реал" 23 ұпай жинап, Испания чемпионатының турнир кестесінде үшінші орынға шықты.