Бокстан әйелдер арасындағы әлем чемпионатында Қазақстан қоржынына екінші медаль түсті

Үндістанның Дели қаласында өтіп жатқан әлем чемпионатында қазақстандық Жайна Шекербекова күміс жүлдеге ие болды, - деп хабарлады Vesti.kz.

51 келіге дейінгі салмақ дәрежесі бойынша өткен финалда Шекербекова КХДР спортшысы Пан Чан Маймен кездесті. Жекпе-жек солтүстік кореялық спортшының жеңісімен аяқталды, 5:0.

Айта кетейік, 2016 жылы Шекербекова Астанада өткен әлем чемпионатының қола жүлдегері болған.

Бұл медаль Қазақстан құрамасы үшін Делидегі ӘЧ-2018 екінші медалі. Бұған дейін Карина Ибрагимова (60 келі) команда қоржынына қола медаль салды.