"Ливерпуль" соңғы минуттарда "Аяксты" ұтты

"Чемпиондар" Лигасының екінші турында "Ливерпуль" мен "Аякс" матчінде жеңімпаз соңғы минуттарда анықталды, деп жазады Vesti.kz тілшісі.

"Энфилдтегі" ойында Юрген Клопп жаттықтыратын ағылшын командасы соңғы минуттарда жеңіс голын салды. Есеп 2:1.

"Мерсисайдтықтар" сапында Мұхаммед Салах (17-минут) мен Жоэль Матип (89-минут) гол салса, қонақтардан Мұхаммед Кудус (27-минут) сәтті ойнады.

Осылайша, "Ливерпуль" биылғы еурокубок маусымында алғаш рет жеңіске жетіп отыр. Турнирдің бірінші турында ағылшындар Италияда жергілікті "Наполиге" (4:1) оңбай ұтылған еді.

Енді 4 қазандағы үшінші тур ойынында Клопп шәкірттері өз алаңында Глазгоның "Рейнджерсін" қабылдаса, қатар өтетін матчте "Аякс" пен "Наполи" кездеседі.