Қазақстандық футболшы өнер көрсететін армениялық команда ЧЛ үшінші іріктеу кезеңіне шықты

Қазақстандық футболшы Геворг Наджарян өнер көрсететін еревандық "Пюник" командасы Чемпиондар лигасының үшінші іріктеу кезеңіне шықты, деп жазады Vesti.kz тілшісі. 

Екінші іріктеу кезеңінің жауапты ойынында "Пюник" командасы сырт алаңда "Дюделанждан" 4:1 есебімен үстем түсті. Армениялық команда сапында Лука Юричич дубльдің авторы атанса, Жуниньо мен Юсуф Отубанджо бір-бір голдан соқты. Ал алаң қожайындары сапынан Мохсин Хассан бір гол салды. 

Наджарян алаңға 87-минутта Отубанджо орнына шықты. 

Осылайша, "Пюник" екі ойынның қорытындысы бойынша "Дюделанж" командасын 4:2 есебімен жеңіп, ЧЛ үшінші іріктеу кезеңіне шықты. 

Енді үшінші іріктеу кезеңінде "Пюник" сербиялық "Црвена Звездамен" кездеседі. Бұл ойындар 4 және 10 тамыз күндері болады.