Футболдан Қазақстан құрамасының қорғаушысы еурокубок қатысушысымен келіссөздер жүргізуде

"Ордабасы" командасының ойыншысы Темірлан Ерланов қарағандылық "Шахтер" сапына ауысуы мүмкін, деп хабарлайды Vesti.kz тілшісі. Қорғаушы қарағандылықтармен келіссөздер жүргізуде.

Бұл клуб Ерланов үшін жалғыз таңдау емес. Бірақ оның қарағандылықтардың намысын қорғау мүмкіндігі өте жоғары болып тұр. 

27 жастағы орталық қорғаушы "Ордабасы" клубынан қаржылық қиындықтарға байланысты кетпек. Ел біріншілігінің осы маусымында Ерланов шымкенттік клуб үшін 15 ойын өткізіп, бір гол және бір сәтті пас авторы атанған еді.

Мұның алдында ойыншы "Восток" пен "Тобыл" намысын қорғаған. Сондай-ақ, оның қоржынында Қазақстан құрамасы сапындағы он ойын және бір гол бар. 

Естеріңізге сала кетейік, 2020 жылғы маусымда "Шахтер" ҚПЛ кестесінде төртінші орын алып, УЕФА-ның жаңа турнирі Конференциялар лигасына өткен еді.