Футболдан Қатарда өтіп жатқан әлем чемпионатының топтық кезеңінің алғашқы ойынында Бельгия футболшылары жеңіске жетті, деп хабарлайды Vesti.kz тілшісі.
Эр-Райан қаласының "Ахмед бин Әли" стадионында өткен кездесуде еуропалықтар Канада құрамасын 1:0 есебімен ұтты.
Матчтың 11-минутында "Бавария" қорғаушысы Альфонсо Дэвис пенальтиден гол соға алмаса, кездесудің 44-минутында Мишель Батшуайи жеңіс голының авторы атанды.
Осылайша, Бельгия алғашқы турдан кейін F тобының көшін бастады.
Хорватия мен Марокко тең (0:0) түскендіктен бір-бір ұпаймен 2-3 орындарға жайғасса, "үйеңкі жапырақ" елінің өкілдері соңғы орынға табан тіреді.
Енді Роберто Мартинес шәкірттері турнирдегі келесі кездесуін 27 қараша күні "Атлас арыстандарына" қарсы өткізеді. Дәл сол күні Канада мен Хорватия өзара мықтыны анықтайды.