Ауыл балалары арасынан "Алтын доп" иегері анықталды

25 қаңтарда Алматы төрінде Aуыл Футбол жобасының басты шарасы – Aуыл Футбол AWARDS-2024 жеңімпаздары салтанатты түрде марапатталды.

Еліміздегі барлық ауылдық аймақтарындағы балалар арасында футболды дамыту және насихаттауға бағытталған жоба жыл бойы сәтті жүзеге асырылып келеді.

– Бұл жоба "Halyk" қайырымдылық қорының еліміздің түкпір-түкпіріндегі мұқтаж жандарды қолдауға және халықтың өмір сүру жағдайын жақсартуға бағытталған жобаларының бірі. Қор ауылдағы спортты дамытуға осыған дейін 500 миллионға жуық қаржы бөлді. Қордың қолдауының арқасында балалар футболы жаңа деңгейге көтеріліп, жастардың спортқа деген қызығушылығын арттыруға жол ашылды», - деді Halyk қайырымдылық қоры Алматы филиалының директоры Ғалымбек Жақсылықов.

Салтанатты шарада 15 номинация бойынша жеңімпаздар марапатталып, оларға Halyk қорының арнайы дипломдары мен ақшалай сыйлықтары табыс етілді. Шара қонақтары арасында танымал футболшылар, кәсіпкерлер, қоғам қайраткерлері, саясаткерлер мен журналистер болды.

"Ауыл Футбол" жобасында "Алтын допты" алып, 2024 жылдың "Үздік футболшысы" атанған Данияр Ислам өз әсерімен былай деп бөлісті: "Бала кезімнен футбол ойнағанды ​​жақсы көремін, менің кумирлерім – әлемдік футбол жұлдыздары. Мен олармен әрқашан мақтанатынмын, үлгі алатынмын! Ал бүгін мен өзім жеңімпаз атандым!".

"Ауыл Футбол" жобасының 2024 жылғы жетістіктеріне тоқталсақ. 2024 жылы жоба жаңа деңгейге көтерілді:

• 16 облыстан 114 команда, оның ішінде 128 жаттықтырушы және 4000-нан астам мектеп жасындағы балалар.

• Қазақстан футбол федерациясының Ұлттық бағдарламасы бойынша 100 ауылдық жаттықтырушы оқудан өтіп, УЕФА D санатын алды.

• 1000-нан астам ойыншы футбол формасымен қамтамасыз етілген.

• "Футболды басқару" курсын 25 жаттықтырушы аяқтады.

• 14 облыстық турнир және қорытынды республикалық турнир өткізілді.

Еске салайық, 2016 жылы Тимур мен Динара Құлыбаевтар құрған Halyk қайырымдылық қоры 120-дан астам әлеуметтік жобаны сәтті жүзеге асырып, 85 миллиард теңгеден астам көмек көрсеткен. Қордың негізгі бастамаларының қатарында ауылдық жерлерде спорттың дамуына ықпал ететін "Ауыл Футбол" және "Ауыл спорт" бағдарламалары бар.