Ауыр салмақтағы қазақ нокаутшы UFC-де болған дағыстандықпен айқасады

Аралас жекпе-жектің қазақстандық шебері Асылжан "Сақ" Бақытжанұлы (15-5) 6 желтоқсан Петерборда өтетін "Наше дело 86" турнирінде жекпе-жекке шығады. 

Қазақ файтердің қарсыласы 34 жастағы дағыстандық Шамиль Гамзатов (14-2). PFL лигасында екі жеңіске жеткен. UFC ұйымында да екі рет жұдырықтасып, бразилиялық Клидсон Абреуді жеңіп, польшалық Михал Олексейчуктен жеңілген екен. 

Кейінгі рет Гамзатов октагонға маусымда өткен "Наше дело" турнирінде шығып, ауыр салмақтағы чемпиондық айқаста Виктор Немковтан жеңілді. 

Асылжан былтыр желтоқсанда ресейлік Максим Гришиннен жеңілгелі жекпе-жек өткізбеді. Алайда кейін бұл жекпе-жек нәтижесі тіркелмей, ол өтпеген болып есептелді. "Сақ" 10 жекпе-жегін нокаутпен аяқтағанын айта кетейік.