Қазақстандық аралас жекпе-жек шебері Асу Алмабаевтың UFC-дегі келесі қарсыласы аустралиялық Стив Эрцег жекпе-жектен бас тартты, деп хабарлайды massaget.kz.
Қазақстандық файтер өнер көрсететін Dar Team командасы жекпе-жекке қатысты ресми мәлімдеме жасады.
"Асу Алмабаев жақын арада АҚШ-қа ұрыс дайындалу үшін ұшатынын ресми түрде мәлімдейміз. Бізге белгісіз себептермен Эрцегтің өзі жекпе-жекке шықпайтын болды. Турнирге дейін бір ай болғандықтан, біздің командамыздың жауынгері үшін жаңа қарсылас таңдалады немесе Стив есін жиып, жекпе-жекті қабылдайды", - деп жазды.
Айта кетейік, Асу Алмабаев пен Стив Эрцег арасындағы жекпе-жек 1 наурыз күні UFC Vegas 103 турнирінде өтуі керек болған. Отандасымыз жекпе-жекке Таиландта дайындалды. Ары қарай АҚШ-та жалғастыруды жоспарлап отырған.