Арман Әшімовтің чемпиондық атаққа таласатын жекпе-жегінің уақыты өзгерді

Қазақстандық жекпе-жек майталманы Арман «Мұстафа Өзтүрік» Әшімов пен украиналық Александр Доскальчук арасындағы жекпе-жектің уақыты өзгертілді.

Арман Әшімов M-1 Global тұжырымының уақытша чемпион атағын жеңіп алғаннан кейін, 12 мамыр күні Қытайдың  Шеньчжень қаласында өтетін M-1 Challenge 91 турнирінде украиналық Доскальчукпен толыққанды чемпиондық атақты сарапқа салу керек болатын. Виза мәселесінің шешілмеуіне байланысты қос спортшы арасындағы жекпе-жек 24 мамыр күні, Санк-Петербург қаласында өтетін болды.

Айта кетейік, Арман Әшімов  M-1 Global тұжырымының белбеуін иеленген алғашқы қазақ. Отандасымыз әлемнің ең үздік тұжырымдарының қатарына кіретін ұйымда 3 жекпе-жек өткізіп, барлығын нокаутпен аяқтаған болатын. Ал украиналық Доскальчук сегізбұрышта 9 жекпе-жек өткізіп, тек 1 рет қана жеңілген.