Олимпиада жүлдегері келесі жекпе-жегінде жалаң қолмен жұдырықтасады

2016 жылғы Олимпиаданың қола жүлдегері америкалық Нико Эрнандес көктемде жалаң қолмен жұдырықтаспақ, - деп хабарлайды vRINGe.com.

Жалаң қолмен жұдырықтасу бойынша жекпе-жек Bare Knuckle промоушенінің турнирі аясында өтеді. Шоудың өтетін жері мен қарсылас кейін белгілі болады. 

"Иә, бәрі толықтай шындық. Алда бокс қолғабынсыз біреудің бетінен жақсылап төпештеуіме тура келеді", - дейді Эрнандес. 

24 жастағы Эрнандес кәсіпқой бокста ең жеңіл салмақта өнер көрсеткен, ал жалаң қолмен жұдырықтасуда өте жеңіл дивизинға көтерілмек. 2016 жылғы Олимпиада ол жартылай финалда Хасанбой Дусматовтан жеңіліп қола иеленген. Ал өзбек боксшысы алтын жеңіп алды. 

Эрнандес кәсіпқойдағы жеті жекпе-жектің бәрінде жеңген (төрт нокаут), бұл спортта ол ең мықты проспектілердің бірі есептелген болатын.