Бірінші жартылай орта салмақта чемпион болған британиялық боксшы Амир Хан (34-6, 21 KO) қазақстандық Жәнібек Әлімханұлы (17-0, 12 KO) туралы ойын айтты, деп хабарлайды Vesti.kz.
Жәнібектің мықтылығының сыры
"Жәнібек – керемет боксшы. Оның күші көп және үстемдігі бар. Мен оны құрметтеймін. Шынымды айтсам, бокста оның жолы жақсы болатынын сеземін. Себебі ол – мықты, жинақы, тәртіпті. Кейінгі айқасында ол қарсыласын оп-оңай нокаутқа түсірді", – деді Хан Qazsport телеарнасының эфирінде.
Еске салайық, 5 сәуір Астанада Әлімханұлы франциялық Анауэль Нгамиссенгені бесінші раундта нокаутқа түсіріп, орта салмақтағы WBO және IBF белбеулерін қорғаған болатын.
Головкин мен өзінің есесі
Сондай-ақ, Хан болашақта Әлімханұлы мексикалық жұлдыз Сауль "Канело" Альвареспен (62-2-2, 39 KO) жекпе-жек өткізе алатыннына үмітті. Айта кетейік, британиялық боксшы "Канелодан" 2016 жылы нокаутпен жеңілген.
"Мен үшін Канело – ең үздік боксшылардың бірі. Мүмкін, бір күні Жәнібек онымен кездесіп, сіздердің GGG (Геннадий Головкин) үшін қарымта қайтарар. Жәнібек нық өсіп келеді, Альвареспен айқасу мүмкіндігіне жетіп қалар. "Канело" – ұлы чемпион және нағыз аңыз", – деді Хан.
Еске салайық, Альварес пен Головкин үш рет жекпе-жек өткізген. Барлығы АҚШ-тың Лас-Вегас қаласында болды: алғашқысы 2017 жылдың қыркүйегінде даулы тең нәтижемен аяқталса, екіншісінде мексикалық төрешілер шешімімен жеңіске жетті. 2022 жылдың қыркүйегінде Альварес тағы да жеңді.
Жарнама