Орта салмақта WBO және IBF чемпионы Жәнібек Әлімханұлы (17-0, 12 KO) осы дивизионда WBC титулына ие доминиканалық Карлос Адамеспен (24-1-1, 18 КО) өтуі мүмкін жекпе-жекке қатысты ойын айтты, сообщают Vesti.kz.
"Мен Карлос Адаместі жаншып тастаймын, нокаутқа түсіріп, зейнетке ертерек шығарамын. Тұман тарқап, жарық түскенде, менің иығымда төрт белбеу болады, WBC мен The Ring-ті қоса алғанда. Бұл жекпе-жек күзге дейін өтуі керек. Егер бұл негізсіз жоғары бағаланып кеткен қорқақ тағы да қашып кетпесе", – деп жазды Әлімханұлы Х әлеуметтік желісінде.
Еске салайық, Әлімханұлы мен Адамес арасында әлеуметтік желілерде бірнеше мәрте жанжалдар туындаған болатын. Екеуі де бір-бірін жекпе-жектен қашып жүр деп айыптауда.
Сонымен қатар, Әлімханұлы WBA чемпионы кубалық Эрисланди Ларамен (31-3, 19 КО) де жекпе-жек өткізгісі келеді.
Жәнібек кейінге рет рингке 5 сәуір күні Астанада шығып, франциялық Анауэль Нгамиссенгені (14-1, 9 КО) нокаутқа түсірген еді.