Иран Халкын ирелеңдеткен Qazaq Titan колумбиялықтарды нокаутқа түсіріп жатыр

Қазақстандық спортшы, үш дүркін КИнЭС рекордшысы Алмат Жұманов (лақап аты Qazaq Titan) 10 желтоқсанда Колумбияның Санта-Марта қаласында кәсіпқой бокстан кезекті кездесуін өткізді.

Қазақ алыбының қарсыласы колумбиялық Хуан Мартинез болды. Бұл жекпе-жекте Жұманов қарсыласын алысқа апармай, екінші раунда техникалық нокаутпен аяқтады. 

Бірінші кездесу сәтті аяқталуына байланысты, келесі жекпе-жек 17 желтоқсанға белгіленді. Енді Алмат бұл күні UBC title Championship Boxing ұйымдастыруымен өтетін бокс кешінде 77 келі салмақ дәрежесінде колумбиялық Монтерросамен чемпиондық белбеу үшін жұдырықтасады.

Еске салайық, Алмат Жұманов - КИнЭС рекордтар кітабының үш дүркін рекордшысы және жалаң қолмен жұдырықтасу спортында АҚШ-тың BKFC лигасымен келісімшартқа отырған алғашқы қазақ. Аталған лигада қыркүйек айында алғашқы жекпе-жегін өткізіп, бірінші раундта техникалық нокаутпен жеңіскен жетті.